'n Tyd gelede hoor ek 'n storie van 'n passasier wat 'n taxi-rit beleef het wat haar uitkyk op die lewe verander het.

 

Met die aankoms by die taxi, het die vriendelike taxibestuurder vir die passasier 'n besigheidskaartjie gegee voordat hy haar bagasie in die voertuig gelaai het. Op die besigheidskaartjie was die woorde: “My werk is om jou reis na jou bestemming gerieflik en gemaklik te maak.”

 

Die binnekant van die taxi was pynlik netjies. Voordat hulle weggetrek het, het die taxibestuurder die passasier gevra wat sy wou lees (met opsies). Ook wat sy wou drink (met opsies) en selfs na watter musiek sy tydens die rit wou luister. Vir die passasier het die diens in die gewone taxi soos 'n limousine-rit gevoel.

 

Uit nuuskierigheid wou die passasier weet of die taxibestuurder hierdie tipe diens vir al sy kliënte lewer. Sy antwoord het haar verras: “Ek het nie altyd nie. Twee jaar gelede was ek 'n tipiese, klaende taxibestuurder wat my werk gehaat het. Ek het dit gedoen omdat ek geglo het dis al wat ek kon doen. Iemand het my op 'n dag gevra of ek 'n sittende eend of 'n arend wil wees? Dit het my laat dink. Ek het daardie dag besluit om wat ek in my hande het tot die beste van my vermoëns te gebruik.”

 

Die verandering vir die taxibestuurder het nie net tot meer lewensvreugde gelei nie. Sy inkomste het verdubbel – en toe weer verdubbel. Daardie oggend was hy toevallig op die taxistaanplek aangesien hy nie meer nodig het om daar te stop nie. Sy kliënte bel hom en hy vervoer hulle waarheen hulle moet gaan.

 

Ons almal kan by hierdie taxibestuurder leer. Maak nie saak hoe jou omstandighede lyk nie, ons het 'n keuse oor hoe ons dit wat in ons hande geplaas is, gaan gebruik. In Kolossense 3:23 lees ons: "Wat julle ook al doen, doen dit van harte soos vir die Here en nie vir mense nie." En in Spreuke 22:29: "Jy sien self: iemand wat vaardig is in sy werk, kom in die diens van konings, nie in die diens van mense sonder aansien nie."

 

God wil vir ons nuwe geleenthede gee. Partykeer is dit egter ons negatiewe houding wat in sy pad staan om dit te doen. Kom ons werk asof ons vir Hom werk en ons vra onsself af: Wat het jy vandag in jou hand? En is jy 'n sittende eend of 'n arend? Sterkte.

 

Gebed: Vader God, baie dankie dat ek kan weet dat U alles sien. Help my vandag om asseblief 'n positiewe ingesteldheid te behou en die beste te maak van wat U in my hand gesit het. Ek vra dit in die Naam van Jesus Christus. Amen.