Omdat Henog geglo het, is hy weggeneem sonder dat hy gesterf het, en hy was nêrens te vind nie, omdat God hom weggeneem het. Van hom word getuig dat hy, voordat hy weggeneem is, geleef het soos God dit wou. Hebreërs 11:5, 1983-vertaling

 

Henog is een van die geloofshelde wat ek die graagste in die hemel sal wil ontmoet. Ons lees net drie keer van hom in die Bybel. Die eerste keer in Genesis 5:18-24, dan in Hebreërs 11:5 en dan in Judas 1:14-15. Die nege verse is genoeg om ons te wys wie hy was.

 

Henog het in 'n moeilike tyd op aarde geleef. Die mensdom was ver van God af en het in sonde geleef. Tog het Henog naby aan God geleef – sodanig dat God hom (soos Elia) weggeneem het sonder dat hy gesterf het. God kon Henog vertrou en juis hierom vind ons sy naam in die lys van geloofshelde in Hebreërs 11 wanneer na hom verwys word as iemand wat geleef het soos God dit wou hê.

 

Ek dink die kern van ons bestaan en verhouding met God lê dalk in Henog se storie opgesluit. Hy het geleef om God te ken en om Hom vir die wêreld bekend te maak. Hy het nie daarna gestreef om iets groot en indrukwekkend vir God op aarde te vermag nie. Nee, omdat hy naby en in gehoorsaamheid aan God geleef het, kon God hom vertrou.

 

Omdat Henog God geken het, kon hy leef soos God dit wou hê. Jesus beklemtoon hoe dit moet wees in Matteus 5:13-16: “Julle is die sout vir die aarde ... Julle is die lig vir die wêreld ... Laat julle lig so voor die mense skyn dat hulle julle goeie werke kan sien en julle Vader wat in die hemel is, verheerlik.” Paulus het iets hiervan verstaan toe hy in Filippense 1:21 skryf: “want om te lewe, is vir my Christus, en om te sterwe, is vir my wins.

 

Mag ons nooit afwyk van die belangrikste missie: Om God te ken en Hom bekend te maak. Hieruit vloei alles.

 

Gebed: Vader God, baie dankie dat ek kan weet dat U my geskape het om 'n verhouding met U te hê. Help my asseblief om nie so weggevoer te raak met alles wat ek vir U wil doen, dat ek van U vergeet nie. Praat asseblief met my deur u Heilige Gees en help my om U te ken soos Henog en in gehoorsaamheid aan U te leef. Ek vra dit in die Naam van Jesus Christus. Amen.