Kon dit maar weer met my gaan soos lank gelede, soos in die dae toe God nog sy hand oor my gehou het ... Job 29:2, 1983-vertaling

 

In Job 29 sit Job op die ashoop. Platgeslaan. Sy gemaklike leefstyl is iets van die verlede en hy dink, hy wonder en hy wens. In Job 29:2-4 sê hy: “Kon dit maar weer met my gaan soos lank gelede, soos in die dae toe God nog sy hand oor my gehou het, toe sy lig beskermend oor my geskyn het en my pad in die donker verlig het. Dit was die beste jare van my lewe toe ek nog 'n vertroueling van God was.”

 

Job het duidelik ’n noue verhouding met God gehad. Hy het homself as ’n vertroueling van God bestempel. Hy het God se leiding beleef soos ’n lig wat sy pad verlig. Nou was dit stil. En was ons almal nie ook al daar nie? Daardie oomblikke van stilte wat ons ook laat vrae stel, wonder en wens.

 

Die stil oomblikke is wanneer die diepte van ons geloof getoets word. Gaan ons op God bly vertrou? Gaan ons aanhou om Hom te aanbid vir wie Hy is en nie net vir wat Hy vir ons kan gee nie?

 

In Job 42 vind ons dat Job se houding anders is. Dit is asof hy God vir die eerste keer regtig ontmoet het wanneer hy in Job 42:5 sê: “Tot nou toe het ek net gehoor wat mense van U sê, maar nou het ek U self gesien ...” Dit is asof Job God se krag, heiligheid en soewereiniteit in die stilte nuut ontdek het. Nadat Job vir sy vriende begin bid het, het God sy omstandighede verander en hom dubbeld geseën met wat hy vroeër gehad het.

 

Stil tye gee ons perspektief. Dit help ons om fyner te luister. Dit help ons om ander meer raak te sien. En dit help ons om soos Job God se krag, heiligheid en soewereiniteit opnuut te beleef. Hy sê immers: “Bedaar en erken dat Ek God is!” (Psalm 46:11) Mag jy Hom vandag beleef.

 

Gebed: Vader God, baie dankie dat U my nooit verlaat of in die steek laat nie – selfs nie eens in die stil tye nie. Help my om U nuut te soek in my stil seisoene, eerder as om myself jammer te kry en my rug op U te keer. Lei my om in die stilte U te vind. Ek vra dit in die Naam van Jesus Christus. Amen.