'n Vriend van my het 'n paar jaar gelede ná 'n besoek aan Amerika met 'n spoggerige skootrekenaar teruggekeer. Vir hom was dit 'n item waarop hy trots was aangesien min hiervan in Suid-Afrika beskikbaar was.

 

Op 'n dag het my vriend egter ervaar dat God hom lei om die skootrekenaar vir 'n vriend weg te gee. Aanvanklik wou hy nie, maar die oortuiging het al sterker geword. In gehoorsaamheid (maar met die swaarste denkbare hart) het hy die skootrekenaar aan sy vriend oorhandig – net om in die dae daarna te bly wonder of hy regtig van God gehoor het.

 

By die besef dat hierdie saak besig was om sy vreugde te steel, het hy een oggend spesifiek met God oor die saak gesels. Hy het spesifiek gebid dat God die begeerte na die skootrekenaar uit sy hart sal wegneem. Hy getuig dat hy na die gebed vir die eerste keer weer vrede in sy hart gehad het.

 

Op presies daardie dag het sy vriend aan wie hy die rekenaar gegee het, uit die bloute die rekenaar vir hom teruggebring met die woorde: “Ek het regtig nie hierdie skootrekenaar nodig nie. Vat dit asseblief terug.” Die rekenaar was nie eens eenmaal uit die oorspronklike sak gehaal nie!

 

Die storie laat my dink aan Abraham en Isak. God wou nooit hê dat Abraham vir Isak moes offer nie. Hy was agter Abraham se hart aan. Hy wou sy opregtheid toets. In my vriend se geval wou God sy hart toets. God wou seker maak dat aardse besittings vir my vriend, wat arm grootgeword het, nie belangriker as God is nie.

 

In Kolossense 3:2 lees ons: “Rig julle gedagtes op die dinge wat daarbo is, nie op die dinge wat op die aarde is nie.”

 

Daar is net een plek op ons harte se troon. Mag ons verseker dat dit gereserveer is vir God en vir niks anders nie. Sterkte.

 

Gebed: Vader God, U verdien al die prys in my lewe. Wys my asseblief as daar enigiets in my lewe belangriker as U is. Ek wil hê dat U die plek op my hart se troon moet inneem wat net vir U gereserveer is. Ek vra dit in die Naam van Jesus Christus. Amen.