'n Tyd gelede sit ek oorkant iemand en ontvang nuus wat vir my in daardie oomblik gevoel het asof iemand die mat onder my uitruk.

 

Alhoewel ek gewoonlik slegte nuus vinnig verwerk omdat ek die waarde verstaan om jou gedagtes te vernuwe, was dit dié keer anders. Moeiliker. 'n Dag of twee later het ek begin besef dat ek steeds heeltyd aan die spesifieke gesprek dink. Meer nog, dat die slegte gevoel wat dit in my hart gelaat het, nou selfs my optrede teenoor die mense om my begin affekteer het. Dit het kompleet gevoel asof 'n draak sy kloue in my gedagtewêreld ingeslaan het – wat my stadig maar seker verlam het.

 

Dalk het jy ook al so gevoel – of dalk voel jy vandag so? Dinge soos 'n krisis in die gesin of werkplek, 'n gebroke verhouding of selfs 'n uitdaging met finansies kan maklik begin voel soos die draak wat in ons nekke blaas. As ons nie pasop nie, begin die bekommernis ons oorweldig en dit laat voel ons lam.

 

Die woorde in Eksodus 15:2-3 het my egter vrygemaak. Dit lees: "Die Here is my krag en my beskerming. Hy het tot my redding gekom. Hy is my God, Hom roem ek ... Die Here is oorwinnaar in die stryd, sy Naam is ‘die Here’!" Solank ons nog bekommerd is oor 'n saak, kan ons weet dat ons dit nog nie volkome aan Hom oorgegee het nie. In Filippense 4:6-7 lees ons immers: “Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus.”

 

Sodra ons 'n saak aan God oorgee – volkome oorgee – ervaar ons vrede. Dit is dan dat God die kloue van die draak uit ons gedagtewêreld uithaal sodat ons vry kan leef. Hy gee die oorwinning. Hy is ons God. En Hy maak ons finaal vry. Sterkte.

 

Gebed: Vader God, baie dankie dat U die oorwinning bewerkstellig. Vandag bring ek (noem jou situasie wat jou lamlê) na U. Vul my asseblief met vrede wat alle verstand te bowe gaan. Ek vra dit in die Naam van Jesus Christus. Amen.