Wie is Hy vir jou? - 14 Maart 2025
Benescke Janse van Rensburg
Die Here is naby almal wat Hom aanroep, almal wat Hom in opregtheid aanroep. Psalm 145:18, 1983-vertaling
Ons persepsie van wie God is, word baiekeer deur ons aardse pa gevorm. As hy liefdevol en teenwoordig was, glo ons maklik dat God dieselfde is. Aan die ander kant, as ons pa uitermatig krities was of totaal afwesig, word dit moeilik om te glo dat God ons aanvaar vir wie ons is en dat Hy ons nooit sal verlaat of in die steek sal laat nie.
Soms word ons persepsie oor God bepaal deur iemand anders se openbaring of persepsie – eerder as dat ons Hom leer ken vir wie Hy regtig is.
Die Grammy-wenner, Israel Houghton skryf in sy lied, Wrong About You dat hy 'n nuwe kant van God ontdek het. Hier is 'n uittreksel van die lirieke:
I used to believe so many stories
That You wouldn't like me if You knew me
That I had to strive to see Your glory
I was taught to believe that You were distant
That You tracked me down if I had missed it
That grace wasn't free I had to earn it
But I'm unlearning
And I'm so glad I was wrong about You
Now I know the truth
In Psalm 145:18 lees ons: “Die Here is naby almal wat Hom aanroep, almal wat Hom in opregtheid aanroep.”
Wanneer ons God nie meer as 'n God daar ver sien nie, maar as naby, kommunikeer ons anders met Hom. Ons beleef sy liefde meer intens en ons het meer ontsag vir Hom. Wanneer ons Hom werklik ken, word dit makliker om soos Petrus die boot te verlaat en op die water na Hom te stap.
Wat is jou persepsie van God? Het jy Hom al vir jouself ontdek?
Gebed: Vader God, baie dankie dat ek kan weet dat U 'n liefdevolle, almagtige en heilige God is. Wys my asseblief as daar enige verkeerde persepsies is wat veroorsaak dat ek U nie volkome vertrou nie of nie die pad saam met U stap nie. Ek vra dit in die Naam van Jesus Christus. Amen.