Met die bekendstelling van die Franse kletsrymer, Riles Kacimi, se nuwe album, het hy besluit om iets te doen wat mense aan die praat sou kry. As passievolle drawwer en musikant het hy besluit om die twee dissiplines te kombineer deur 'n trapmeul in 'n glaskas op te stel en vir 24 uur aaneen te draf. Wat dit egter onheilspellend gemaak het, was die drie sirkelsae wat hy agter hom geplaas het wat heeltyd bly draai het. Sou hy sy ewewig verloor of skeef trap, kon dit vir hom noodlottig wees.

 

Met geen musiek of vermaak, slegs die klank van Riles se voeteval, die trapmeul se draai en die onheilspellende teenwoordigheid van die drie lemme, het hy daarin geslaag om 205 km in die 24 uur af te lê!

 

Iets van hierdie prentjie het my laat dink aan die emosie wat ons soms in uitdagende tye ervaar. Ons hardloop ons moeg, maar dit bly voel asof iemand die spoed van die trapmeul bly vinniger stel. Dít terwyl ons nie weet waar die STOP-knoppie is nie.

 

Dalk was jy al daar of dalk is jy vandag daar. Onthou die woorde in Psalm 37:5: “Laat jou lewe aan die Here oor en vertrou op Hom; Hy sal sorg.” Ook in 1 Petrus 5:7 lees ons: “Werp al julle bekommernisse op Hom, want Hy sorg vir julle.”

 

God stop die trapmeul en Hy verwyder die sirkelsae. Hy gee ons rus in die gejaag, vrede in die storm en Hy herstel die vreugde in ons harte sodat ons met meer selfvertroue die toekoms kan instap. Kom ons gee Hom 'n kans.

 

Gebed: Vader God, baie dankie dat U in beheer is van my lewe. Vandag bring ek spesifiek (noem die uitdaging) na U toe. Bring asseblief weer vrede en vreugde in my lewe en lei my met wysheid oor hoe om die situasie te hanteer. Ek vra dit in die Naam van Jesus Christus. Amen.