In Japan het Shitsui Haikoshi op 108-jarige ouderdom die wêreld se oudste haarkapper geword. Sy was 14 jaar oud toe sy begin het om hare te sny. Sy hou steeds haar skêr self vas – en sy het onlangse 'n vieringseremonie saam met haar 85-jarige dogter en 81-jarige seun bygewoon.

 

Op die vraag wat haar so gesond en aan die gang hou, het sy geantwoord dat daar drie dinge is wat jy nooit moet doen nie: Moet nooit 'n wrok koester nie, moet nooit jaloers wees op iemand anders nie en moet nooit met ander mense baklei nie. Dít is iets wat sy by haar ma geleer het.

 

Die drie reëls het my laat dink aan Jesus se woorde in Matteus 5:9: “Geseënd is die vredemakers, want hulle sal kinders van God genoem word.” Ook lees ons in Psalm 133 dat waar daar eenheid is, God se seëning uitgestort word. En dan in Romeine 12:18-19,21 word ons aangemoedig: “As dit moontlik is, sover dit van julle afhang, leef in vrede met alle mense. Moenie self wraak neem nie, geliefdes, maar laat dit oor aan die oordeel van God ... Moet jou nie deur die kwaad laat oorwin nie, maar oorwin die kwaad deur die goeie.”

 

Die vyand wil ons uitlok en versoek. Hy wil ons laat glo dat dit ons “reg” is om kwaad te wees as iemand ons te nagekom het. Die teendeel is egter waar. Ons het nodig om die saak aan God oor te gee. Ons het nodig om doelbewus vrede in ons lewens te kies – nie deur konflik te vermy nie, maar om te kies om gesprekke te voer wat die vrede in ons lewens bewaar. Só rus God se seëning op ons.

 

Gebed: Vader God, baie dankie dat ek my geloof en vertroue in U kan plaas. Vergewe my asseblief vir waar ek toegelaat het dat die vyand my vrede steel. Help my om sover ek kan in vrede te leef met die mense om my. Ek vra dit in die Naam van Jesus Christus. Amen.