Onlangs het 'n pa van Somerset-Wes saam met sy 17-jarige seun en twee 14-jarige vriende, sewe uur lank aan die romp van hul omgeslane boot in yskoue water vasgeklou. Die voorval het vroegoggend tussen Vermont en Hawston plaasgevind, en digte mis het hulle gedisoriënteer.

 

Teen 12:40 die middag het die mis opgeklaar en strandgangers kon die vier manne skaars 100 meter van die kus af sien. Die Nasionale Seereddingsinstituut (NSRI) is ontbied en het hulle gered. Al vier is vir hipotermie behandel, terwyl die pa en seun, wat tydens die bootomslag beseer is, in die hospitaal opgeneem is.

 

Stel jou voor hoe die vier gevoel het toe hulle besef hulle was al die tyd slegs 100 meter van veiligheid af. As hulle dit vroeër geweet het, sou hulle moontlik na die kus toe geswem het.

 

Soos hulle, bevind ons ons soms in benarde situasies, omhul deur die "mis" van onsekerheid terwyl ons aan ons eie lewensbote vasklou. In sulke tye moet ons onthou dat God alwetend is en elke oplossing ken.

 

Psalm 46:2-4 sê: "God is vir ons 'n toevlug en 'n beskerming; Hy was nog altyd bereid om te help in nood. Daarom is ons nie bang nie, al gee die aarde pad, al skuif die berge tot in die dieptes van die see, al druis en skuim die waters van die see, al skud die berge deur sy onstuimigheid." En in 2 Kronieke 16:9 lees ons: "Die Here het sy oë oral op die aarde sodat Hy dié kan help wat met hulle hele hart op Hom vertrou."

 

Geen uitdaging is te groot vir God nie. Hy sien ons deur die "mis" en Hy ken die pad huis toe. Kom ons plaas ons vertroue opnuut in Hom.

 

Gebed: Vader God, dankie dat ek my geloof en vertroue in uitdagende tye in U kan plaas. Lei my, asseblief, en versterk my geloof. Ek bid dit in die Naam van Jesus Christus. Amen.