God is lig, en geen duisternis is in Hom nie. 1 Johannes 1:5b, 1983-vertaling

 

’n Man by ’n Chinese lughawe het onlangs sekuriteitsbeamptes die skrik op die lyf gejaag toe hulle 14 lewende slange in sy broek ontdek het! Die reisiger was besig om deur doeane te gaan toe beamptes iets in sy broek sien beweeg.

 

By nadere ondersoek het hulle klein sakkies om sy bene vasgebind gevind – gevul met lewende slange, sommige daarvan giftig! Toe hulle hom vra hoekom hy die slange smokkel, het die man glo gesê hy wou ’n reptielplaas begin, maar wou nie deur die amptelike (en wettige) roetes gaan nie. Owerhede het die slange gekonfiskeer, en die man staar nou boetes én ’n baie ongemaklike verduideliking aan sy familie in die gesig.

 

Soms neem ons, soos hierdie man met die slange, ook kortpaaie of doen iets wat ons weet nie God se goedkeuring wegdra nie – ’n duistere werkstransaksie, ’n vriendskap met iemand buite ons huwelik wat net eenvoudig “te” vriendelik is of sonde wat ons dink ons mee kan wegkom.

 

In 1 Johannes 1:5 lees ons: “God is lig, en geen duisternis is in Hom nie.” Ook in Lukas 8:17 lees ons: “Daar is niks geheim wat nie openbaar sal word nie, of weggesteek wat nie bekend sal word en aan die lig sal kom nie.”

 

God is lig en in Hom is geen duisternis nie. Kom ons maak seker ons leef só dat die wêreld Hom in ons kan raaksien.

 

Gebed: Vader God, baie dankie vir u liefde en genade. Help my asseblief om te alle tye in die lig te leef. Ek vra dit in die Naam van Jesus Christus. Amen.