'n Paar dae gelede gesels ons tydens die radioprogram waarby ek betrokke is oor wat dit beteken om in ons moderne lewe 'n barmhartige Samaritaan te wees. Wanneer help jy en wanneer stap jy liewer weg?

 

Een van die WhatsApp-boodskappe wat ons gekry het, het my diep getref. 'n Luisteraar vertel hoe sy regdeur haar hoërskooljare vir haar ma gevra het om vir haar 'n ekstra kosblik vir een spesifieke meisie by haar skool te pak. Alhoewel sy nie al die meisie se omstandighede geken het nie, het sy ervaar dat sy haar moes help.

 

Jare ná skool, het hulle mekaar weer op Facebook gevind. Hier het die meisie haar vertel dat sy nooit sal besef wat daardie kosblik op 'n dag vir haar beteken het nie. By die huis was haar pa 'n alkoholis en haar broer het haar saans seksueel misbruik. Deur die moeilikste tyd van haar lewe, het daardie kosblik elke dag by die skool vir haar iets van Jesus se lig en liefde gewys. Vandag is hierdie vrou gelukkig getroud en streef sy daarna om ook Jesus vir ander te wys.

 

In Spreuke 3:27-29 lees ons: “Moenie 'n weldaad weerhou van iemand aan wie dit toekom, terwyl dit in jou mag is om dit te bewys nie. Moenie vir iemand sê: "Gaan eers terug en kom môre weer, dan help ek jou," as jy nou reeds kan help nie.” Ook in Spreuke 19:17 lees ons: “Wie hom oor 'n arm mens ontferm, gee 'n lening aan die Here, en Hy sal hom ten volle vergoed.”

 

God wil sy liefde aan ons demonstreer. Mag ons vandag onthou dat ons sy hande en voete moet wees vir mekaar deur gehoorsaam te wees en goed te wees vir mekaar – selfs al verstaan ons nie noodwendig 'n ander se situasie nie.

 

Gebed: Vader God, baie dankie dat U vir ons omgee. Vergewe my asseblief vir tye wat ek nie gehoorsaam was vir u roepstem om u hande en voete op aarde te wees nie. Help my asseblief om duidelik u Heilige Gees se leiding te ervaar. Ek vra dit in die Naam van Jesus Christus. Amen.