In 2019 het 'n egpaar in die Amerikaanse staat, Michigan, 'n ou huis gekoop met die idee om dit te restoureer. Tydens die renovasie het hulle 'n vreemde ontdekking gemaak: onder die huis se vloer het hulle op honderde ou skoenhouers vol geld afgekom! Die geld was heeltemal wettig en dateer terug na die 1950’s en 60’s.

 

Ná verdere ondersoek het hulle besef dat die vorige eienaar van die huis, 'n ou man wat onlangs gesterf het, sy lewe lank sy spaargeld in skoenbokse onder die vloer versteek het. Die totale bedrag was meer as $40,000 (R722 798,40) – 'n fortuin vir daardie tyd! Die egpaar het besluit om 'n deel van die geld aan liefdadigheid te skenk en die res te gebruik om die huis op te knap.

 

Hierdie storie herinner ons aan God se vermoë om vanuit vreemde oorde vir ons te voorsien. In Psalm 23:1-3 lees ons: “Die Here is my herder, ek kom niks kort nie. Hy laat my rus in groen weivelde. Hy bring my by waters waar daar vrede is. Hy gee my nuwe krag. Hy lei my op die regte paaie tot die eer van sy Naam." Ook in Jakobus 1:17 lees ons: “Elke goeie gawe en elke volmaakte geskenk kom van Bo. Dit kom van die Vader wat die hemelligte geskep het ...” En in Psalm 37:4 staan geskryf: “Vind jou vreugde in die Here, en Hy sal jou gee wat jou hart begeer.”

 

Mens sal nooit weet of die egpaar in Michigan dalk gebid het en vir God gevra het om hulle finansieel te seën om die restourasie te doen nie. Tog demonstreer hierdie storie vir my dat God werklik weet wat ons benodig en ook dat Hy in staat is om dit vir ons te gee – selfs uit oorde wat ons nie eens aan gedink het nie.

 

Kom ons vind ons vreugde in die Here en onthou dat elke goeie gawe en volmaakte geskenk van Hom kom. Sterkte.

 

Gebed: Vader God, baie dankie vir elke genadegawe wat ek elke dag uit u hand ontvang. Help my om nie moeg te raak om U te vertrou as ek op 'n deurbraak wag nie, want ek glo dat elke goeie en volmaakte geskenk van U kom. Ek vra dit in die Naam van Jesus Christus. Amen.