Ek sluit vandag die Maart-reeks af met 'n herinnering dat God nie van jou vergeet het nie – al voel dit soms so.

 

In Junie verlede jaar het NASA-ruimtevaarders Sunita Williams (58) en Barry Wilmore (61) na die Internasionale Ruimtestasie (ISS) vertrek vir 'n besoek van agt dae. Hul beplande terugkeer sou aan boord van Boeing se Starliner-ruimtetuig plaasvind. Kort ná hul aankoms het die Starliner tegniese probleme ondervind wat veroorsaak het dat dit sonder mense teruggekeer het aarde toe. Die ruimtesending het vir 284 dae aangehou voordat die ruimtevaarders veilig na die aarde teruggestuur is.

 

Met die ruimtevaarders se tuiskoms, het die kapsule waarin hulle vervoer is in die water beland waar hulle deur 'n klomp dolfyne omring is – kompleet asof dit daar was om hulle welkom te heet.

 

Teëspoed en teleurstelling veroorsaak dat ons soms, soos hierdie ruimtevaarders, afgesluit voel van mense en selfs van God. Ons twyfel of Hy van ons bestaan weet en of Hy ons gebede hoor.  

 

In Romeine 8:38-39 lees ons egter: “Hiervan is ek oortuig: geen dood of lewe of engele of bose magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei wat daar in Christus Jesus, ons Here, is nie.” Ook in Efesiërs 3:18-19 lees ons: “Mag julle in staat wees om saam met al die gelowiges te begryp hoe wyd en ver en hoog en diep die liefde van Christus strek. Mag julle sy liefde ken, liefde wat ons verstand te bowe gaan, en mag julle heeltemal vervul word met die volheid van God.”

 

God het nie van jou vergeet nie. Sy liefde vir jou is onmeetbaar en Hy wag dat ons in sy teenwoordigheid instap waar daar geen teëspoed, teleurstelling of trane is nie. 'n Plek waar die geloofshelde wat voor ons geleef het ons met oop arms gaan verwelkom (soos die dolfyne) en saam met ons sal stap tot by die Een waaroor alles gaan. Mag ons nooit twyfel aan sy liefde vir ons nie. Sterkte.

 

Gebed: Vader God, baie dankie dat U my liefhet en nie van my vergeet nie – selfs al voel dit soms so. Help my U beter te leer ken en u liefde in my lewe meer intens te beleef. Ek vra dit in die Naam van Jesus Christus. Amen.