Daarom word ons nie moedeloos nie. Ons liggame is besig om te sterf, maar God maak ons geestelike lewe elke dag nuut. 2 Korintiërs 4:16, Bybel vir almal

 

Daar is die afgelope paar maande 'n spesifieke trend op sosialemedia: "I met my younger self for coffee." Die idee is dat jy jouself indink hoe 'n koffieafspraak saam met jou jonger self sou verloop en hoe jy dan vir jou jonger self vertel hoe jy deur die jare verander en gegroei het.

 

Sê nou maar net jy kon inderdaad gaan koffie drink saam met 'n jonger weergawe van jouself, wat sal jy kan oorvertel? Waarvan sal jy kan getuig? En dan natuurlik, hoe sal jy voel oor die dinge wat jy vertel? Is daar dinge waaroor jy spyt is? Waarop is jy trots?

 

Daar is dalk 'n paar ekstra kilogramme aan jou lyf, dalk 'n paar plooie of grys hare. Kan jy sê dat jy na jou gesondheid kyk, of het jy sommer net laat gaan?

 

Dalk het jy jou droomwerk? Of dalk geniet jy glad nie dit wat jy doen nie.

 

Vertel jy van 'n gelukkige gesin en sterk familiebande, of moet jy vir jou jonger self sê dat daai verhoudings wat eens so spesiaal was, nou verbrokkel het?

 

Is jy gemaklik met wie jy is? Ver verwyder van die tiener wat onseker voel en met tye geboelie is nie? Voel jy eensaam, of kan jy getuig van wonderlike vriende en kollegas wat jou lewe inkleur?

 

Is jy nader aan God, of veel, veel verder van Hom as jare terug? Kan jy vir jou jonger self sê dat God die pad saam met jou stap en dat jy kan getuig van sy liefde en genade? Kan jy jou jonger self, wat dalk gewonder en getwyfel het oor die toekoms, gerusstel en sê dat jy oukei is en dat jy oukei is met die besluite wat jy gemaak het? En as jy dalk teleurgesteld voel oor sekere besluite en dinge wat nie verloop het soos jy gehoop het nie, het jy weer opgestaan? Het jy die stof afgeskud en wéér probeer?

 

Gaan dink 'n bietjie. Wat sou jou jonger self graag wou hoor? Wat sal jou jonger self gerusstel en gelukkig maak?

 

Gebed: Here, lei my om besluite te maak wat my nader aan U bring en my kan help om 'n lewe te leef waarop my jonger self sou trots wees. Help my om elke dag as 'n nuwe kans te sien om my lewe te verbeter. Amen.