Ek kan myself nie beskerm nie, ek het gebid, en die Here het gehoor. Hy het my gered van alles wat dit sleg laat gaan het met my. Psalm 34:7, Bybel vir almal

 

Ek was nou die dag gelukkig om saam met my man en kind vir 'n langnaweek weg te breek na een van my gunstelingbestemmings in die land. Die Tuinroete lê van kleins af na aan my hart want ons het vir baie van my grootwordjare elke Desember daar gaan vakansie hou saam met ons groot familie.

 

Ek onthou hoe ek baie vakansies laatmiddag of selfs in die aand op 'n bankie langs die see gaan sit en na die gedruis van die branders geluister het. Daai alleentye op die bankie was my eie, spesiale stiltetyd. Dit was tyd waarin ek my gedagtes kon orden na 'n lang jaar, dinge waaroor ek my bekommer het kon deurtrap, gevoelens kon verwerk. Ek het baiekeer op daai bankie gesit en gebid en God se stem in die branders beleef. Soms was my kop vol muisneste, soms was dit sommer net gedagtes oor die lewe, bekommernisse oor 'n nuwe skooljaar. Daar was daai tyd al vir my troos in die koel seelug en iets vreedsaam in Mosselbaai se liggies wat in die verte flikker.

 

Kort na ons aankoms nou die dag, het ek alleen saam met my dogtertjie strand toe gestap. Toe ons by die houttrappies kom, was die oomblik vir my groot en oorweldigend. My trane het vlak gesit. Daar was iets heilig daaraan om ná hoeveel jaar vir haar die plek te gaan wys waar 'n baie groot gedeelte van my grootword en my hartsdinge lê, selfs al verstaan sy min. Toe ons by die paadjie afstap het twee vroue vir ons gewys waar dolfyne in die water baljaar.

 

God weet hoe en waar om ons te vind. Hoor jy sy stem? God se stem is nie net in die kerk tydens 'n preek of in 'n Bybelvers opgesluit nie. Jy sal sy stem ook op ander plekke hoor. Soms in die natuur, in die wind, die gedruis van branders, maar ook in die stilte. Selfs in die verkeer. Dis soms in mooi musiek. Of iewers waar jy baie gelukkig of selfs hartseer is. Ja, God weet waar om jou te vind, daaroor hoef jy jou nooit te bekommer nie. Hy weet wanneer en waar jou hart en gemoed oop is. Hy wéét.

 

Gebed: Dankie Vader dat U altyd weet waar om my te vind en dat U my hart aanraak. Help my U stem in my lewe te hoor. Amen.